الدرس الثاني : العلم و إعرابه

اذهب الى الأسفل

الدرس الثاني : العلم و إعرابه

مُساهمة من طرف Admin في الثلاثاء سبتمبر 11, 2018 12:25 pm


بسم الله
معانا النهاردة درس خفيف و لذيذ جدا اسمه ( العَلَم )

عرفنا في الدرس اللي فاات النكرة و المعرفة و عرفنا كل واحدة معناها ايه
و كنا قولنا للمعرفة دي اقسام
النهاردة هناخد اول قسم بقا و هو ( العلم )

يعني ايه العلم
قالولنا في اللغة يعني الحاجة الظاهرة ، الحاجة الواضحة
عشان كده بنلاقي حد يقول انا فلان يقولوا مين فلان علم من اعلام مصر يعني
معنى الكلام ان العلم بيكون معروف عند الكل
و عشان كده شعار الدول بنقول عليه علم ( اللي هو مصر مثلا احمر و ابيض و اسود ) عشان معروف يعني بيسموه علم

طب في النحو بقا
قالوا ان العلم اسم بيدل ع مسمى معين
يعني ايه ؟؟
يعني العلم ده اعرفه لما الاقي اسم بيميز صاحبه عن غيره ،، بعرف منه لكل حاجة اسم بيميزها
يعني اسم ( محمد ) بيدل ع شخص معين اسمه محمد و بيميزه عن واحد تاني اسمه مصطفى مثلا
لما اقول ( مكة ) الاسم ده ميز مكة عن البلاد التانية و كمان بقت معروفة بالاسم ده ،، و بيدل ع شيء معين و هي البلد اللي احنا عارفينها و كمان في عصرنا ده ممكن نلاقي بنت اسمها مكة فهيكون ده برضوا بيميزها عن البنات التانية في الاسم
تمام كده ؟
كده عرفنا معنى العلم
............................................
و العلم ده بيتقسم لنوعين
١- مفرد ٢- مركب
ناخد اول واحد و هو المفرد و ده بيكون العلم اللي من كلمة واحدة زي ايه
محمد ، زيد ، هند ، سعاد ، احمد ، محمود
و هكذا ،، تمام ؟
و ده بيتعرب عادي زي اي كلمة عادية

جاء محمد
العلم ( محمد ) علم مفرد
فاعل مرفوع و علامة رفعه الضمة

سلمت على محمد
( محمد ) اسم مجرور و علامة جره الكسرة
يبقا المفرد زي اي كلمة عادي
تمام ؟
...............................

تاني نوع بقا اللي هو المركب
و ده اللي بيتكون من كلمتين او اكترو بيتقسم ل ٣ انواع
١- مركب اضافي
٢- مركب مزجي
٣- مركب اسنادي
...............................................................
ناخد اول واحد ( العلم المركب تركيبا اضافيا )
و ده بيكون من كلمتين و الكلمتين دول مضاف و مضاف اليه
عشان كده بيسموه مركب اضافي
و اشهر الاعلام ظي اللي بتبدا ب ( عبد ) و ( ابو ) و ( ام ) زي ايه
عبد الله ، عبد الرحمن ، عبد الرحيم
ابو بكر ، ابو قتيبة ، ابو قتادة
ام المؤمنين ، ام النور ، ام سعيد
ده اسمه مركب تركيب اضافي و اتفقنا بيتكون من ايه ؟
مضاف و مضاف اليه
يبقا الكلمة التانية تتعرب ( مضاف اليه مجرور )
طب و الكلمة الاولى دي ع حسب موقعها نشوفها بقا فاعل ولا مفعول و لا مبتدا ولا خبر و لا اسم مجرور و هكذا
نشوف امثلة
جاء ابو بكر
العلم فين ( ابو بكر )
الكلمة الاولى بعد فعل هنسال مين اللي جه ؟
هلاقي ( ابو )
يبقا ابو فاعل مرفوع و علامة رفعه الواو لانه من الاسماء الخمسة
و اتفقنا الكلمة التانية تكون مضاف اليه
( بكر ) مضاف اليه مجرور و علامة جره الكسرة
عاوز اقولك لما سالت مين اللي جه؟ رديت ( ابو بكر ) يعني المفروض نقول فاعل كلها صح ؟
هقولك انت خد كلمة فاعل للكلمة الاولى عشان التانية مضاف اليه ع طول
و الكلام ده في المركب اضافيا
تمام ؟

رأيت عبد الله
فين العلم ( عبد الله ) مركب اضافي
طيب مين اللي رأي ؟ انا اللي هو تاء الفاعل
رأيت ايه ؟ عبد الله
يبقا عبد الله مفعول به صح ؟
هناخد مفعول به دي للكلمة الاولى و الكلمة التانية تكون مضاف اليه مجرور

(عبد) مفعول به منصوب و علامة نصبه الفتحة
( الله ) لفظ الجلالة مضاف اليه مجرور و علامة جره الكسرة
سهلة ؟
.......................................................
تاني نوع ( العلم المركب تركيبا مزجيا )
و ده بيكون كلمتين لزقوا في بعض و بقوا زي الكلمة الواحدة
زي ايه
( حضرموت ،، بعلبك ،، معديكرب ،، سيبويه ،، خمارويه )
دول اشهر المركب تركيبا مزجيا
و هنقسمهم
( حضرموت ،، بعلبك ،، معديكرب )
( سيبويه ،، خمارويه ،، نفطويه ،، و اي اسم مختوم زيهم كده ب ويه )
تمام ؟
طب قسمتهم ليه ؟؟
عشان هقولك ان الكلمات اللي فوق اللي هي ( حضرموت ،، بعلبك ،، معديكرب )
تتعرب اعراب الممنوع من الصرف
يعني تترفع بالضمة و تنصب بالفتحة و تجر بالفتحة
و الاعراب هيكون للكلمة ع بعضها ازاي
سافرت الي بعلبك
العلم ( بعلبك ) مركب مزجي
و هنا بعد حرف جر و يعرب اعراب الممنوع من الصرف يبقا يجر بالفتحة
يبقا
( بعلبك ) اسم مجرور و علامة جره الفتحة لانه ممنوع من الصرف

تمام ؟

جئت الى حضرموت
العلم ( حضرموت ) مركب مزجي
و بعد حرف جر
يبقا
اسم مجرور و علامة جره الفتحة لانه ممنوع من الصرف

بعلبك مدينة جميلة
في اول الجملة
مبتدأ مرفوع و علامة رفعه الضمة
عادي هي الفكرة في حالة الجر بس و سهلة
ده كان القسم الاول

القسم التاني بقا اللي هو ( سيبويه ،، خمارويه ،، نفطويه ،، و اي اسم مختوم زيهم كده ب ويه )
ده هيتعرب ازاي ؟
ده هنقول عليه
مبني ع الكسر في محل كذا
ثابت ؟ اه

زي ايه

سيبويه عالم جليل
سيبويه في اول الجملة يكون مبتدأ
مبتدأ مبني ع الكسر في محل رفع

رأيت سيبويه
( سيبويه ) مفعول به مبني ع الكسر في محل نصب

سلمت على سيبويه
( سيبويه ) اسم مجرور مبني ع الكسر في محل جر

و زي سيبويه اي اسم منتهي ب ( ويه )
....................................................
تالت نوع ( المركب تركيبا اسناديا )
و النوع ده مش عاوزك تستغربه
عارفين اللي بيسمي ابنه او بنته مثلا ( صلي على النبي )
انا اعرف حد كده
طيب لو الاب اسمه محمد
يبقا الاسم هيكون كده
صلي على النبي محمد
صح ؟
يبقا جملة ( صلي على النبي) كلها اصبحت اسم شخص
يعني بقت علم
صح كده ؟

العرب بقا كانوا بيسموا
( تأبط شرا ،، جادَ الحق ،، سُر مَن رأي ،، الخير نازل )
طبعا لو اول كلمة فعل يبقا التركيب فعلي
و لو اول كلمة اسم يبقا التركيب اسمي
اللي يهمني افهم ان ده تركيب كده ع بعضه كانوا بينادوا بيه ع الناس
و كمان كان اسمهم كده زي ما اتفقنا
و طبعا كل واحد منهم ليه قصة هنبقا نجيبها عشان نفهم الاسم يعني ايه

يبقا نرجع تاني التركيب المزجي عرفناه
و عبارة عن تركيب كده يعامل معاملة الكلمة الواحدة

و يتعرب ازاي ده
بص يا سيدي مش هو بيتعامل معاملة الكلمة الواحدة ؟
يبقا انطق التركيب زي ما هو بدون تغيير مهما كان فاعل او مفعول او اسم مجرور
مهما كان يفضل زي ما هو
و اقول مرفوع بالضمة المقدرة
منصوب بالفتحة المقدرة
مجرور بالكسرة المقدرة
طب ايه خلاها مقدرة
نقول منع ظهورها اشتغاال المحل بحركة الحكاية
يعني ايه الحكاية
يعني عشان هو تركيب و اتنقل لينا كده
و اتحكى لينا كده
فده منعنا من ان احنا نظهر عليه الحركات عشان كده بقت مقدرة
تمام ؟
نشوف مثال

جاء تأبط شرا
العلم ( تأبط شرا ) مركب اسنادي
و موقعه فاعل
يبقا
( تأبط شرا ) فاعل مرفوع و علامة رفعه الضمة المقدرة منع ظهورها اشتغال المحل بحركة الحكاية

سلمت على الخيرُ نازلٌ
العلم ( الخير نازل ) اسم شخص كده ،، مركب اسنادي
موقعه اسم مجرور
يبقا
( الخير نازل) اسم مجرور و علامة جره الكسرة المقدرة منع ظهورها اشتغال المحل بحركة الحكاية

تمام
اظن سهلة صح ؟
.......................................................
باقي حاجة في العلم بقا
اسمها
الاسم و اللقب و الكنية

( الاسم ) ده العادي اللي احنا عارفينه
محمد ، احمد ، عباس ، شوقي ، فتحي ، مكة ، الكعبة ، بيت المقدس
اي اسم بيدل ع حاجة معينة

( الكنية ) و دي اللي بتبدأ ب ( اب - ام - ابن - بنت - اخ - اخت - عم - عمة - خال - خالة )
زي ايه
ابو بكر ،، ابو حفص ،، ابن مريم ،، عم النبي ،، ابن الاكرمين ،، ابو محمد ،، ام سعيد ،، ام المؤمنين ،، بنت الصديق
دي اسمها كنية

اللقب ده اللي بيكون فيه مدح او ذم لصاحبه
زي ايه
الفاروق ،، العدل ،، الصادق الأمين ،، الرشيد ،، الصديق ،،

محمد الصادق الامين
ابو بكر الصديق
هارون الرشيد
الفاروق عمر
عمر ابو حفص
ابو حفص عمر
اسماء بنت الصديق
المسيح عيسى ابن مريم

و هكذا
اظن نعرف نطلع الاسم و اللقب و الكنية
تمام ؟

بالنسبة للتقديم و التاخير

( الاسم مع الكنية )
عادي يجوز كل واحد فيهم يجي قبل التاني
يعني اقول
( عمر ابو حفص ،، ابو حفص عمر )
(عيسى ابن مريم ،، ابن مريم عيسى )

( اللقب مع الاسم )
المفروض الاسم يجي الاول
عمر الفاروق
عيسي المسيح
بس لو اللقب مشهور يجوز نبدا بيه عادي
الفاروق عمر
المسيح عيسى

و كده الحمد لله الدرس خلص

..................................................................

و السلام عليكم و رحمة الله
avatar
Admin
Admin

المساهمات : 31
تاريخ التسجيل : 19/07/2018

معاينة صفحة البيانات الشخصي للعضو http://elmohtarefeen.ahlamontada.com

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى