الدرس العاشر : الفعل اللازم و الفعل المتعدي

بسم الله
الوقتي معانا درس سهل اسمه اللازم و المتعدي
احنا عشان نفهم هنقول ان الافعال هي اللي بتخلي الفاعل مرفوع و هي كمان اللي بتخلي المفعول منصوب
طب جميل يعني الفعل يضرب اللي بيقوم بالفعل ده يخليه فاعل
و يروح ضارب الحاجة اللي اتعملت يخليها مفعول به
راجل مفتري الفعل ده

لكن بقا في افعال جت تضرب الحاجة اللي بتتعمل دي
قامت واقفة قصاده و قالتله لا انت تلزم حدودك ضربت الفاعل و قولنا ماشي انما انا لا و قالتله انت من النهاردة لازم تلزم حدودك
يعني كده اسمه ايه ؟ لازم
يبقا ضرب مين ؟ الفاعل بس
الله
يبقا الفعل اللازم هو اللي بيجي بعده فاعل بس
يعني ضرب اللي قام بالفعل بس
زي ايه
ذهب احمد الي المدرسة
الفعل ذهب ده ضرب كلمة احمد عشان هو اللي قام بالفعل خليته ايه ؟ فاعل
طب ضرب حاجة تانية ؟
لا
يبقا الفعل ذهب فعل لازم
طب مثال تاني
ظهر الحق
مين اللي ظهر ؟ الحق
يعني الحق فاعل صح ؟
يعني مفيش مفعول به يبقا الفعل ده لازم

طب مثال تالت
انتصر العدل
مين اللي انتصر
العدل
يبقا فاعل ، في مفعول ؟
لا يبقا الفعل ده لازم

تمام لحد هنا ؟
يبقا الفعل لازم حدوده و معداش بعد الفاعل
و نعرف الفاعل ازاي نسال عنه بمين عمل كذا

سهلة ؟
......................................
نيجي لحاجة تانية
طب لما حد ميلزمش حدوده مع جاره و يجي عليه بنقول ايه ؟
دا اتعدى علي حقوقه صح ؟
يعني اتعدى اهو يبقا الفعل لما ميلزمش حدوده عند الفاعل و يعدي و يضرب المفعول كمان يبقا اسمه ايه ؟
متعدي
عشان مفتري بيتعدى ع حقوق المفعول به

طب زي ايه
شرب احمد اللبن
مين اللي شرب ؟ احمد يبقا ده فاعل
ادي اول واحد اتضرب
شرب ايه ؟ اللبن ادي المفعول به
يبقا اتعدى اهو ع المفعول
يبقا متعدي
طب بنعرف المفعول ازاي اسال عمل ايه


نااخد مثال تاني
كتب احمد الواجب
مين اللي كتب ؟ احمد ادي الفاعل
كتب ايه ؟ الواجب ادي المفعول
يبقا متعدي

فهم الولد الدرس
مين اللي فهم ؟ الولد ادي الفاعل
فهم ايه ؟ الدرس ادي المفعول
يبقا متعدي
يعني لما تيجي سيرة المفعول يبقا متعدي
تمام ؟

طب حلو اوي
الفعل اللازم اللي فوق خالص ده
ينفع يكون متعدي ؟
نشوف كده امثلة

ذهب محمد
ظهر الحق
جلس الولد
قعد الضيف

دول كلهم لازمين حدودهم و ولاد ناس
ينفع يتعدوا ؟ اه لو حطيت همزة في اول الفعل او تضعف الحرف اللي في النص هتلاقي المعني اتغير و لازم يبقا متعدي
شوف كده
أذهب محمد. المعني ناقص مين اللي أذهب ؟ هنحتاج فاعل نقول مثلا
أذهبت محمدا أذهب الولد محمدا
او. ذهّبتُ محمدا

أظهرت الحق. انا اللي اظهرت و الحق بقا مفعول يعني بقا متعدي

أجلست الضيف
انا اللي اجلسته و الضيف بقا مفعول يعني بقا متعدي

و هكذا جرب انت بقا الباقي
تمام ؟
......................................
نيجي لحاجة بعد كده هو ينفع الفعل ده يتعدي و يضرب اكتر من واحد ؟
اه
يعني هو مفتري اوي كده ؟ اه
دا ازاي بقا

اقول يا عم هما في شوية افعال لموا بعض و عملوا عصابة
سموا نفسهم احنا عصابة (ظن و اخواتها )
و هما ايه بقا (ظن ، حسب ، علم ، رأي)
دول بقا اتفقوا انهم اي جملة اسمية هيمسكوها يضربوها و يخلوها بدل ما هي مبتدا و خبر لا هيتعدوا عليها و يقلبوها مفعول به اول و مفعول به ثان
مثال عشان نفهم
الاتصال سهل
مبتدا. خبر
تيجي العصابة
ظن محمد الاتصال سهلا
فعل فاعل مفعول١. مفعول٢
سهلة ؟
حسب الولد الاتصال سهلا
فعل فاعل مفعول ١. مفعول ٢

الشمس مشرقة
مبتدا. خبر

حسبت الشمس مشرقة
فعل و فاعل مفعول١. مفعول ٢

يبقا ظن و اخواتها هنحفظهم و نعرف انهم بينصبوا مفعولين
شفنا ازاي بتنصبهم مفتريين بقا
و كمان قولنا انهم بيدخلوا ع المبتدا و الخبر بتقلبهم لمفعولين
يعني المفعولين دول في الاصل كانوا ايه
مبتدا و خبر
يبقا ظن و اخواتها تنصب مفعولين اصلهما المبتدا و الخبر
....................................
نشوف كمان عصابة سموا نفسهم عصابة ( أعطي و اخواتها ) و هما (أعطي ، منح ، وهب ، كسى )
و دول بقا مبيضربوش الجملة الاسمية لا
دول بيضربوا اللي خد او اتوهب او اتمنح او اتكسى بيضربوه هو و الحاجة اللي خدها

أعطي المدير الطالب الجائزة
مين اللي أعطي ؟ المدير فاعل
مين اللي خد ؟ الطالب ده المفعول الاول اتضرب
خد ايه ؟ الجائزة ادي المفعول التاني اتضرب برضوا
يبقا اللي خد و الحاجة اللي خدها دول هما المفعولين بتوعنا

تمام ؟

طب مثال تاني

وهب الله مصر جوا جميلا
مين
اللي وهب ؟ الله. لفظ الجلالة فاعل
مين اللي اتوهب ؟ مصر
اتوهبت ايه ؟ جوا
ادي المفعولين بتوعنا


و هكذا مع منح و باقي الافعال
احط ايدي ع اللي خد و الحاجة اللي خدها و يبقا هما دول المفعولين

طب دول قولنا مبيضربوش الجملة الاسمية يعني المفعولين اصلهم مش مبتدا و خبر
يبقا دول تنصب مغعولين ليس اصلهما المبتدا و الخبر

تمام ؟


كده عرفنا الفعل المحترم اللي لازم حدوده
و عرفنا اللي ضرب جاره بس المفعول به
و عرفنا عصابتين بيضربوا اتنين مع بعض


طب هو في حد بيضرب تلاتة جيرانه ؟
اه
يعني تلت مفاعيل ؟ اه
رأي و علم اتفقنا فوق انهم بينصبوا مفعولين صح ؟
طب و كمان الهمزة بتزود مفعول زي ما شفنا لما كان لازم و خليناه متعدي

طب لو جربنا نحط الهمزة مع رأي و علم هيزودوا مفعول و يبقوا تلاتة و لا ايه ؟
بالظبط ده اللي هيحصل


زي ايه
أعلمت محمدا عمرا ذكيا
اعلمت فعل و فاعل
محمدا مفعول اول
عمرا مفعول ثان
ذكيا مفعول ثالث


مثال تاني
أريت فاطمة العلم نورا

أريت فعل و فاعل
فاطمة مفعول اول
العلم مفعول ثان
نورا مفعول ثالث


شفت اللعبة



و كده يكون الدرس خلص خلاص و الحمد لله



و السلام عليكم و رحمة الله