الدرس السادس : الفعل الصحيح و الفعل المعتل

من طرف **Admin** الإثنين يوليو 23, 2018 3:26 am

شرح الفعل من حيث كونه صحيح ام معتل
عاوزين نعرف الاول كده يعني ايه صحيح و معتل
لو شخص صحيح يعني صحته تمام كده بنقول عليه صحيح مفيهوش مرض و المرض يعني علة يبقا الانسان الصحيح هو اللي مفيهوش علة
تمام ؟
طب لو شخص مريض يبقا فيه علة يبقا ده معتل بالعلة دي

يبقا كده عندنا في الافعال
الفعل الصحيح اللي هو مفيهوش حرف من حروف العلة
الفعل المعتل هو اللي فيه حرف من حروف العلة
طب واحد هيسال ايه هي حروف العلة ؟
هي ( واي ) و عشان متنساش افتكر حرف ال y
و نفهم كده انهم الالف و الواو و الياء

فهمنا الصحيح و المعتل ؟
ناخد امثلة نفهم
أكل. فيك حرف علة ؟ لا يبقا صحيح
حد هيقولي ما هو فيه الف اهو
لا صحصح معايا في فرق بين الهمزة و بين الالف
الهمزة (أ) ده حرف صحيح اما الالف (ا) ده حرف علة
و اللي في أكل دي همزة عشان كده قولنا عليه صحيح

فهم. فيك حرف علة ؟ لا يبقا صحيح

قال. فيك حرف علة ؟ اه. الالف اهو يبقا معتل

سأل. فيك حرف علة ؟ لا عشان دي همزة. يبقا صحيح

سال. فيك حرف علة ؟ اه عشان دي مش همزة يبقا معتل

تمام كده ؟
فهمنا لحد هنا

...................................................................
ناخد بقا اقسام كل حاجة و نفهم براحة
...................................................................
**** أولا الصحيح ****
ده عندي ٣ انواع
١- مهموز. ٢- مضعف. ٣- سالم

١- مهموز جاية من الهمزة يعني الفعل هيكون فيه همزة سواء في الاول او في النص او في الاخر
زي ايه
أكل. أخذ. أمر. سأل. قرأ.
و هكذا
كل دول نوع الفعل ايه ؟
هفكر ازاي شوف كده
انت صحيح و لا معتل ؟
لا صحيح عشان مفيش حرف علة
طب انت فيك همزة ؟ اه يبقا مهموز
يبقا النوع صحيح مهموز

تمام ؟

٢- المضعف. و ده اللي فيه شدة يعني تضعيف. مضعف جاي من التضعيف يعني الشدة اللي فوق الحرف
زي ايه. شدّ مدّ جدّ سدّ
اصلهم شدد. مدد. جدد سدد
و هكذا
دول افكر برضوا
انت صحيح و لا معتل ؟ لا صحيح
طب فيك همزة ؟ لا يبقا مش مهموز
طب فيك تضعيف ؟ اه يبقا مضعف
يبقا النوع صحيح مضعف

في بقا نوع تاني رباعي بيكون الحرف الاول و التالت زي بعض و التاني و الرابع زي بعض
زلزل. وسوس. لجلج
بيعتبروا النوع ده انه الحروف متكررة و التضعيف يعني تكرار فاعتبروا الرباعي اللي زي ده
يكون صحيح مضعف

تمام ؟

٣- سالم. و ده الفعل الصحيح العادي اللي مفيهوش لا همزة و لا تضعيف
فهم. ذكر. سلم. نظر. سمع. شرح
نيجي نفكر
انت صحيح و لا معتل ؟ صحيح عشان مفيش حرف العلة
طب فيك همزة ؟ لا يبقا مش مهموز
طب فيك تضعيف ؟ لا يبقا مش مضعف
طب ده صحيح و مفيهوش همزة و لا تضعيف
يبقا انت النوع التالت اللي هو سالم
يبقا النوع صحيح سالم
...................................................................
**** ثانيا المعتل ****

الفعل المعتل و اتفقنا ان هيكون فيه حرف علة زي (قال باع كان) (وعد وقف) (دعا قضى حظي رمى) (وعى وقى وفى) (روى شوى)
كل دول فيهم حرف علة يبقا فعل معتل

طب هو في انواع للفعل المعتل ؟ ايوة

١- مثال
كلمة مثال بتيجي لما احب ابدأ كلام و اضرب مثل للحاجة اللي بتكلم. عنها صح ؟
يعني بعد كلمة مثال بيبقا بداية كلام و اول كلام صح ؟
خد كلمة اول دي و هقول لما يكون الفعل اول حرف فيه حرف علة يبقا ده اسمه مثال
زي ايه
وعد. وفد. وقف
انت معتل
و اول حرف يبقا مثال
يبقا النوع معتل مثال

٢- أجوف
لما الواحد بياكل أكل تقيل يقول انا جوفي تاعبني
الجوف ده اللي هو جوا بين صدره كده داخل ع المعدة
يعني عاوز اقولك انه في نص جسمه
خد بقا ده
و اقولك لما حرف العلة يكون في النص يبقا ده اسمه اجوف من الجوف يعني
زي ايه
قال. باع. كان. نام
معتل
و الحرف في النص يبقا اجوف
يبقا معتل اجوف

٣- ناقص
دايما النقص يكون في اخر الشيء لان البداية بتبقا بحماس انما في الاخر لازم حاجة تنقص
عاوز اقول لما حرف العلة يكون في الاخر يبقا ده اسمه ناقص
زي ايه
دعا. رمى. قضى. حظى
معتل تمام
و اخر حرف يبقا ناقص
يبقا معتل ناقص

٤- لفيف مفروق
اللفيف بقا هيكون عندي حرفين علة مش حرف واحد
افهم معايا
لفيف يعني بيلفوا ورا بعض صح ؟
طب مفروق يعني بيلفوا اه بس في حرف بينهم فاصلهم عن بعض
زي ايه
وعى. وفى. وقى
ملاحظ حرفين اهو بس التالت فاصل بينهم عشان كده بنقول مفروق
و هكذا

٥- لفيف مقرون
هنا بقا الحرفين مقرونين يعني مقترنين ببعض يعني ورا بعض بدون فاصل يعني لازقين في بعض
زي ايه
شوى كوى. روى
ملاحظ حرفين العلة ورا بعض مفيش فاصل بينهم
يبقا لفيف مقرون

..................................................................

و السلام عليكم و رحمة الله