الدرس السابع عشر : علامات الإعراب

درس النهاردة (علامات الإعراب) سهل جدا بس محتاج شوية تركيز
و هنعرف شوية حاجات في البداية عشان تسهلنا الدرس و نبقا فاهمين

١- المبتدأ دايما مرفوع .. و اعرفه ازاي؟ اول كلمة في الجملة هي المبتدا

٢- الخبر دايما مرفوع .. و اعرفه ازاي ؟ اسال ( المبتدا ماله ؟ ) الاجابة هي الخبر
محمد مجتهد
اول كلمة ؟ ( محمد ) يبقا ده مبتدا مرفوع
محمد ماله ؟ ( مجتهد ) يبقا ده خبر مرفوع

٣- الفاعل دايما مرفوع .. اعرفه ازاي ؟
اشوف فين الفعل اللي في الجملة و اسال ( مين اللي عمل الفعل ده ). الاجابة هو الفاعل
(ذهب محمد). مين اللي ذهب ؟ محمد يبقا محمد فاعل

٤- اسم كان دايما مرفوع .. اعرفه ازاي ؟
هلاقي كان + ( اسم كان ) اسم هنتكلم عنه+ ( خبر كان ) كلام عن الاسم اللي فات ده
كان محمد مجتهدا
مين اللي كان ؟ محمد. اسم كان مرفوع
كان ماله ؟ مجتهد. خير كان منصوب خلي بالك انه منصوب عشان هنتكلم عنه كمان شوية
يبقا اسم كان هو اللي مرفوع

٥- خبر ( إن ) دايما مرفوع .. اعرفه ازاي ؟
نفس الكلام بعدها اسم ان هنتكلم عنه + خبر ان الكلام اللي هنتكلمه
ان محمدا مجتهد
مين اللي ان ؟ محمدا. اسم ان منصوب
ماله محمد ؟ مجتهد. خبر ان مرفوع
يبقا خبر ان مرفوع
و اسم كان مرفوع
نركز هه

٦- المفعول به دايما منصوب .. اعرفه ازاي ؟
اسال سؤال عمل ايه ؟ او ب ايه ؟
شرب محمد اللبن
مين اللي شرب ؟ محمد فاعل مرفوع
شرب ايه ؟ اللبن. مفعول به منصوب
٧- خبر كان دايما منصوب
و شفناه فوق بنعرفه ان هو الكلام اللي بنتكلمه عن اسم كان

٨- اسم ان دايما منصوب و شفناه برضوا فوق
هو مين اللي ان ؟ هو ده اسمها

٩- الاسم المجرور من اسمه بيكون مجرور و ده بعد حروف الجر زي ( من - الي - عن - علي - في ).
الولد في البيت. في حرف جر و البيت اسم مجرور

١٠- المضاف اليه دايما مجرور
و ده اشهر حالاته ان بيجي بعد ( كل - بعض - فوق - تحت - بين - غير - سوى )
العصفور فوق الشجرة. الشجرة مضاف اليه مجرور

كده انت معاك اهم حالات الاعراب نلخصهم في اللي جاي
١- مرفوع (مبتدا - خبر - فاعل - اسم كان - خبر ان)
٢- منصوب ( مفعول به - خبر كان - اسم ان)
٣- مجرور ( الاسم المجرور - المضاف اليه)
تمام كده؟

تعال بقا نشوف مرفوع ب ايه و منصوب بايه مجرور بايه
و لا هي ازاي العملية يعني


√√ تنقسم العلامات الي (اصلية و فرعية)

ناخد اول حاجة الاصلية و هي (الضمة ، الفتحة ، الكسرة)

١- الضمة

و دي بتختص بمواضع الرفع يعني الكلمة تكون مرفوعة زي مثلا (المبتدأ ، الخبر ، الفاعل ، النعت لحاجة منهم ) نقول (مرفوع و علامة رفعه الضمة) بس هي اي كلمة كده نقول مرفوع بالضمة لا في كلمات معينة كده هي اللي تخص الضمة
( المفرد ، جمع التكسير ، جمع المؤنث السالم)
امثلة بقا
- محمد مجتهد
كلمة محمد مبتدا يبقا مرفوع طب هي مفرد يبقا ضمة يبقا نعرب مبتدا مرفوع و علامة رفعه الضمة
و مجتهد خبر نفس النظام
- المعلمات نشيطات
المعلمات مبتدا و جمع مؤنث يبقا ضمة
يبقا مبتدا مرفوع بالضمة
و نشيطات خبر مرفوع بالضمة
- الأقلام جميلة
الأقلام جمع تكسير و مبتدا يبقا ضمة برضوا
يبقا الاقلام مبتدا مرفوع بالضمة لانه جمع تكسير
جميلة خبر مرفوع بالضمة لانه مفرد
كده الضمة تمام ؟

٢- الفتحة

و دي بتختص بالنصب يعني الكلمة تكون في موضع نصب زي (المفعول به ) و كمان مش اي كلمة تكون بالفتحة لكن برضوا الفتحة ليها كلمات معينة (المفرد ، جمع التكسير )
زي ايه
رأيت الولد
كلمة الولد مفعول به عشان رايت ايه ؟ الولد يبقا مفعول به و جاية مفرد يبقا فتحة
نعرب مفعول به منصوب و علامة نصبه الفتحة
اشتريت الأقلام
كلمة الأقلام مفعول به ( اشتريت ايه ؟الاقلام ) يبقا منصوب طب دي جمع تكسير يبقا فتحة
يبقا مفعول به منصوب و علامة نصبه الفتحة


٣- الكسرة

و دي بتخص بحالة الجر يعني (اسم مجرور ، مضاف اليه )
طب نفس الحكاية ايه الكلمات اللي بتكون مع الكسرة ( المفرد ، جمع التكسير ، جمع المؤنث السالم )
زي ايه
-سلمت على البنت
كلمة البنت بعد حرف جر يبقا اسم مجرور طب ده مفرد يبقا كسرة
اسم مجرور و علامة جره الكسرة

كتبت بالاقلام
الاقلام اسم مجرور و ده جمع التكسير يبقا كسرة
يبقا اسم مجرور و علامة جره الكسرة

سلمت على المعلمات
كلمة المعلمات اسم مجرور و دي جمع مؤنث
يبقا كسرة برضوا
يبقا اسم مجرور و علامة جره الكسرة

** نقول ملحوظة بقا
جمع المؤنث السالم عرفنا انه بيترفع بالضمة
و يتجر بالكسرة
طب يتنصب ب ايه ؟
اقولك بالكسرة برضوا يعني ينصب و يجر بالكسرة

الجر عرفناه فوق طب النصب زي ايه
رأيت المعلمات
كلمة المعلمات مفعول به يبقا منصوب طب دي جمع المؤنث يبقا الكسرة
مفعول به منصوب و علامة نصبه الكسرة لانه جمع مؤنث سالم


كده العلامات الأصلية تمام
..................................................................
نيجي للعلامات الفرعية
( الالف و الواو و الياء )

١- الالف
و ده بيكون في حالة رفع و مع المثني
يعني يكون عندي كلمة مثني بتدل ع اتنين يعني و تكون الكلمة دي ( مبتدا او خبر او فاعل او اسم كان او خبر ان )
و نعرب نقول ( مرفوع و علامة رفعه الالف لانه مثنى)
جاء الولدان
مين اللي جاء ؟ الولدان. تبقا فاعل مرفوع
طب انتي مفرد و لا مثنى و جمع ؟
مثنى ،طب المثنى مرفوع بالالف
يبقا فاعل مرفوع و علامة رفعه الالف لانه مثنى

٢-الواو
و دي برضوا في حالة الرفع بس تكون الكلمة جمع مذكر يعني بتدل ع جماعة مذكر و نعرب نقول مرفوع و علامة رفعه الواو لانه جمع مذكر سالم
المعلمون نشيطون
المعلمون اول كلمة تبقا مبتدا مرفوع
طب انت مفرد و لا مثني و لا جمع ؟
جمع
طب مذكر و لا مؤنث و لا تكسير
اعرب ازاي ؟
اخره واو نون يبقا جمع مذكر سالم
اخره الف تاء يبقا جمع مؤنث سالم
لا اخره ده و لا ده يبقا جمع تكسير
يبقا كلمة المعلمون
جمع مذكر
يبقا مرفوع بالواو
نعرب : مبتدا مرفوع و علامة رفعه الواو لانه جمع مذكر سالم
و نشيطون
خبر مرفوع و ده جمع مذكر يبقا بالواو
خبر مرفوع بالواو لانه جمع مذكر

٣- الياء
الياء دي بقا سهلة خالص
لو كلمة مثني في حالة نصب او حالة جر
و لو كلمة جمع مذكر في حالة نصب او حالة جر
كل ده يبقا منصوب بالياء و مجرور بالياء

تعالوا نشوف امثلة
- سلمت علي الولدين
الولدين بعد حرف جر يبقا اسم مجرور
طب انتي مثني يبقا بالياء
اسم مجرور بالياء لانه مثنى

- رايت الولدين
الولد مفعول به ( رايت ايه) يبقا منصوب
و انتي مثنى يبقا بالياء
يبقا مفعول به منصوب بالياء لانه مثنى

- سلمت علي المعلمين
المعلمين بعد حرف جر يبقا اسم مجرور
و انتي مفرد و لا مثنى و لا جمع ؟
جمع مذكر يبقا بالياء
اسم مجرور بالياء لانه جمع مذكر سالم

- رايت المعلمين
رايت ايه ؟ المعلمين يبقا مفعول به منصوب
و انت جمع مذكر يبقا منصوب بالياء
مفعول به منصوب بالياء لانه جمع مذكر سالم

كده تمت علامات الإعراب والحمد لله
..................................................................

و السلام عليكم و رحمة الله