الدرس التاسع : الفعل الجامد و المتصرف

النهاردة معانا درس جميل و سهل جدا اسمه الجامد و المتصرف
يعني ايه جامد و متصرف بالبلدي كده عشان نفهم؟
لما بنشوف واحد متنشن في حياته كده يعني ناشف كده و التعامل معاه ناشف
بنقول عليه دا جامد في التعامل يعني مبياخدش و يدي فس الكلام كده

بنقول عليه جامد عشان هو التعامل معاه واخد صورة واحدة و هي انه قافش
تمام كده ؟
عكسه بقا واحد تاني مرح كده و بحبوح و حلو ، لذيذ في التعامل كده
بياخد و يدي في الكلام معاك و لو حد تاني كلمه تلاقيه عادي واد زي ما بيقولو كده مفتح
طيب المفتح ده كده مش صورة واحدة دا التعامل معاه عادي خالص ف ده
هنسميه متصرف يعني بيتصرف كده في المواقف و في التعامل شغال عادي
يبقا شخصين واحد جامد و التاني متصرف

تعالالي بقا للنحو اللي بنشرحه
الفعل الجامد ده اللي هو مينفعش يجي منه مضارع و لا يجي منه امر
يعني هو في صورة واحدة كده قافش علينا بيعاملنا وحش

بيجي في الماضي بس طب زي ايه
( نعم ، بئس ، ليس ، عسى ، كرب ، )
كفاية تعرف دول انهم جامدين يعني ماضي بس مفيش مضارع و لا امر
يعني ليس مينفعش يليسَ غلط طبعا عشان هو بيعاملنا وحش و جامد كده قافل
اللي فات ده كان ماضي ميجيش منه مضارع و لا امر
في جامد بقا بس ع صيغة الامر ميجيش منه ماضي و لا مضارع
زي ايه
هَبْ بمعني. احسب او ظُن

هَبْ الحياة جميلة
فعل فاعل مستتر مفعول اول مفعول ثان

هنا ده جامد مالوش مضارع و لا ماض
و ده الجامد اللي بيجي ع صيغة الامر دايما


ده مش اللي جاي من معنى الهيبة
لان الهيبة فعلها
هاب يهاب هب

و لا من معني وهب
لان التاني
وهب يهب هب

طب و انا اعرف ازاي من معني الجملة
لو معناه ظن يبقا ده جامد و هتلاقيه امر بس
لو معناها فيها هيبة من الله او خوف لسبب معين ده متصرف عادي

لو معناه من وهب يعني منح و اعطي و دول عارفينهم يبقا متصرف برضوا


في بقا فعل تاني جامد اسمه
تعلّمْ بمعني اعلم
مش من الفعل تعلم يتعلم
لا
دا ده امر بمعني اعلم كذا
تعلّم الحق منصورا
اعلم الحق منصورا

بمعني اعلم
ده برضوا جامد من صيغة الامر

..................................................................
نيجي للمتصرف بقا في النحو

المتصرف ده تلاقي واحد اتفقنا بحبوح كده و حلو في التعامل
ده في النحو اللي يجي منه الماضي و المضارع و الامر
شغال عادي و ده معظم افعالنا منه زي ايه
قرأ يقرأ اقرأ
كتب يكتب اكتب
سمع يسمع اسمع
فتح يفتح افتح
صام يصوم صم
قام يقول قم
و هكذا اي فعل نعرف نجيب منه الماضي و المضارع و الامر ده نقول عليه ( تام التصرف )


طب في واحد بحبوح بس مش اوي
تلاقيه كده مثلا مع صحابه عادي بحبوح
بس مع الناس الغريبة يعني لامم نفسه شوية
يعني مش تام التصرف لا دا ناقص التصرف
يجي منه الماضي و المضارع بس
زي ايه
ما زال.... ما يزال
وما برح ....ما يبرح
ما انفك ..... ما ينفك
ما فتىءَ ..... ما يفتأ
كاد .... يكاد
أَوشك.....يوشك
تقريبا كده دول الافعال المشهورة جدا بانها ناقصة التصرف


كده اظن الدرس واضح جدا و مفيش اي حاجة
المطلوب اعرف كل نوع تحته كام فعل كده و اعرفهم و خلاص
..................................................................


و السلام عليكم و رحمة الله