الدرس السابع : المعرب من الأفعال ( إعراب الفعل المضارع )

لازم الاول نعرف ان في حاجه اسمها مبني و معرب من الاسماء و مبني و معرب من الافعال
يعني ايه ؟
هنعرف بس واحده واحده
المهم خلينا ننفق ان في مبني و معرب من هنا و هنا

نبدأ بالمبني و المعرب من الافعال

يلا نتفق ان الحيطة اللي جنبك في البيت مبنيه هي بتتحرك ؟ لا
بتتغير ؟ لا
يعني ثابته ع شكل واحد ؟ اه
هو ده البناء في النحو سواء افعال او اسماء الكلمة اخر حرف فيها بيفضل زي ما هو ما بيتغيرش و المعرب هو اللي بيتغير اخر حرف في الكلمة حسب الاعراب سواء رفع او نصب او جر
يعني المبني مابيتغيرش المعرب بيتغير

تعال نشوف الافعال
و نبدا بالمعرب منها و هو الفعل المضارع

المضارع
بيبقا معرب و مبني هنبدأ بالمعرب

المضارع هو بيدل ع حاجه بتحصل الوقتي

يعرب ازاي ؟
يعني يبقا مرفوع و منصوب و مجزوم

نبدأ بالرفع
يبقا مرفوع لو مجاش قبله اي اداة يعني يجي لوحده كده من غير حاجه قبله
زي يكتب ، يقرأ ، يمشي ، يأكل

طب ايه علامة الرفع
حاجتين بس. الضمة لو فعل عادي مش فيه (ون ، ان ، ين)
يعني يكون كده يكتب ، يقرأ ، يجري
يكتب محمد الدرس
يكتب هنا فعل مضارع مرفوع بالضمة

يقرأ محمد الدرس
مضارع مرفوع بالضمة

عاوز اقول ان الافعال دي كده اخر حرف فيها حرف صحيح مش حرف علة
بمعني ان الحرف الاخير مش (و ، ا ، ي)
يبقا لو زي اللي فات قولنا مضارع مرفوع بالضمة و هننطقها يكتب يكتبو تمام ؟
طب لو اخر حرف واو. او الف او ياء
هنقول مضارع مرفوع بالضمة المقدرة
زي ايه
الطفل يحبو. ضمه مقدرة ع الواو
الولد يمشي. ضمة مقدرة ع الياء
الولد يسعي. ضمة مقدرة ع الالف دي ياء لا اسمها الف لينة

تمام ؟

طب لو في (ون ، ان ، ين )
ملاحظ ايه ان كلهم فيهم نون صح
يبقا مرفوع بثبوت النون

زي ايه
هم يخلصون
انتما تخلصان
انت تخلصين

يبقا. مضارع مرفوع بثبوت النون

تمام ؟
يعني الاقي فعل اخره ون ان ين و يكون بيدل ع معناه يعني ون جمع مذكر ان مثني ين بيخاطب مؤنث
يخلصان. يمشيان. يمشون. يكتبون. تكتبين. و كده

عرفنا رفع المضارع
..................................................................
تعالوا نشوف
نصب المضارع

في ادوات معينة تيجي قبل الفعل تخليه منصوب
زي ايه
(أن مش إن ، لن ، كي ، حتي ، فاء السببية ، لام الجحود)
دي ادوات لو جت قبل الفعل المضارع تنصبه زي
لن تكتب الدرس
ان نكتب الدرس فهو خير
ذاكر كي تنجح
يذاكر الطالب حتي ينجح
ذاكر فتنجح
ما كان الفشل ليكون املا

طب دول منصوبين ماشي العلامات ايه بقا
عندي الفتحة
لو كان الحرف الاخير مش (و. ا. ي )
زي
لن يقرأ. لن يكتب. لن يقوم
منصوب بالفتحة الظاهرة

لو منتهي ب ( و. ا. ي. )

يكون منصوب بالفتحة المقدرة لو الفعل اخره بنطقه الف
زي
لن يسعي هنا منصوب بالفتحة المقدرة

طب لو كان اخر الفعل بنطق ياء او واو
تبقي فتحة ظاهرة

لن يدعو هنا منصوب بالفتحة الظاهرة
لن يقضي هنا منصوب بالفتحة الظاهرة

طب في في علامات تانيه
اه
حذف النون
هناك كان ثبوت هنا حذفها
يعني مش هيكون في نون

زي ايه

يسمعون. لن يسمعوا. منصوب بحذف النون
يكتبون. لن يكتبوا. منصوب بحذف النون
يكتبان. لن يكتبا. منصوب بحذف النون
يشربان. لن يشربا. منصوب بحذف النون
تكتبين. لن تكتبي. منصوب بحذف النون

عاوز اقولك ان ده مع كل الادوات ناصبة عادي

بس لام الجحود
لازم يكون قبلها كان و منفية
ازاي
ما كان محمد ليفشل
ما كان احمد ليكذب

شرط لازم يجي كون منفي قبلها

عرفنا المضارع المنصوب

..................................................................
تعالوا نشوف المضارع المجزوم

اول حاجه
جواب الطلب
من الاخر لقيت فعل امر او نهي او استفهام بعده فعل مضارع
و المضارع ده نتيجه عن الطلب ده اللي هو امر او نهي او او

يبقا المضارع ده مجزوم لجواب الطلب زي ايه

ذاكر تنجج
اجتهد تنجح
افهم تعذر
لا تلعب تندم

و هكذا
كل المضارع مجزوم

تاني حاجه في ادوات معينة زي (لام الامر ، لم ، لا الناهية )

زي ايه
ليكن العلم شعارنا
لم تكتب الدرس
لا تلعب في الشارع

كله مجزوم
في ادوات تجزم فعلين و ده اسلوب الشرط هنتكلم عنه في درس لوحده

طيب انا عرفت كده بيتجزم ازاي
ايه العلامات
اول حاجه السكون
لو فعل اخر حرف عادي مش ( و ا ي )
تكتب. مرفوع بالضمة
لم تكتب. مجزوم بالسكون

يقرأ. مرفوع بالضمة
لم يقرأ. مجزوم بالسكون

طب لو اخره حرف (و ا ي )
هنحذفه و ده اسمه ايه حرف عله يبقا مجزوم بحذف حرف العلة

زي ايه

يسمو مرفوع بالضمة المقدرة
لم يسم (و ينطق لم يسمو بردوا) مجزوم بحذف حرف العلة

يسعي. مرفوع بالضمة المقدرة
لم يسع. و تنطق لم يسعي بردوا
مجزوم بحذف حرف العلة

و هكذا
خلي بالك في الرفع كان مقدر و النصب مقدر لكن هنا بحذف حرف العلة خالص

طب لو تنتهي ب (ون ، ان ، ين)
نحذف النون
زي
يخلصان. لم يخلصا. مجزوم بحذف حرف النون

تكتبين. لم تكتبي مجزوم بحذف النون
يكتبون. لم يكتبوا. مجزوم بحذف النون

و هكذا

ملحوظة
لما يكون في فعل زي
قال كان نام خاف نال قام
الافعال دي المضارع بتاعها
يقول يكون ينام يخاف ينال يقوم

تمام ؟
طب دول اخر حرف مش (و ا ي)
يعني جزم بالسكون
طب دا الافعال دي الحرف الاقبل الاخير فيها اللي هو واو او الف دول حروف علة
يعني حروف ساكنة
طب لم يجي الجزم يبقا في سكون تاني
كده عندي اتنين سكون
الاول الحرف قبل الاخير اللي هو حرف العلة
و التاني علامة الجزم
و ده مينفعش بنحذف حرف العلة اللي هو الحرف قبل الاخير لانه اضعف
و بنخلي السكون
و يبقا كده الجزم بالسكون مش بحذف حرف العلة لان اخر حرف صحيح
يعني هيكونوا كده

لم يكن. لم يقم. لم يقل. لم ينم. لم ينل. لم يخف

متقولش اصلها كان و بقت يكن الالف اتحذف يبقا مجزوم بحذف حرف العلة
لا لا لا لا غلط

الحرف الاخير هو الحكم و هو هنا صحيح يبقا مجزوم بالسكون

و كده عرفنا المضارع المعرب كله
..................................................................


و السلام عليكم و رحمة الله