الدرس الأول : النكرة و المعرفة

اذهب الى الأسفل

الدرس الأول : النكرة و المعرفة

مُساهمة من طرف Admin في الخميس سبتمبر 06, 2018 5:43 pm

بسم الله
النهاردة معانا درس بسيط جدا اسمه النكرة و المعرفة
الاول نعرف يعني ايه نكرة و يعني ايه معرفة
النكرة دي بالبلدي كده حاجة مش عارفها .. حاجة مجهولة ليا .. معرفش عنها حاجة .. حاجة مبهمة
المعرفة دي عكس النكرة خالص يعني هتكون عارفها .. حاجة انا عندي معلومات عنها .. حاجة عارفينها و بنتكلم عنها
تمام ؟
ناخد مثال يوضحلنا الامور
هقولك جملتين
الاولى : هات ورقة
التانية : هات الورقة

ايه الفرق في المعنى بين الجملتين ؟؟
هات ورقة .. يعني اي ورقة هات اي ورقة تقابلك مش ورقة معينة يعني .. لا دا اي ورقة .. يعني مش ورقة معروفة او ورقة عارفينها
عشان كده كلمة ورقة كانت نكرة

انما لما اقولك هات الورقة .. كده يبقا في ورقة معينة انا و انت عارفينها فبقولك هاتها .. يبقا ورقة معروفة .. ورقة معينة .. مش اي ورقة
عشان كده كلمة الورقة معرفة يعني عارفين انهي ورقة بالظبط

طيب فهمنا المعنى ؟؟
طب انت عرفت ازاي ان كلمة ورقة نكرة
و كلمة الورقة معرفة ؟؟؟

هنتفق انا و انت الوقتي ان اي كلمة مفيهاش الف و لام ( ال )ـ
هنسميها نكرة زي كلمة ورقة اللي فوق قولنا عليها نكرة

طيب و اي كلمة فيها الف و لام ( ال )ـ
هنسميها معرفة

دي مش مطلقا بس مبدئيا هنتفق علي كده لكن في حالات تانية هنعرفها في وقتها
بس الاساس كده تمام ؟



لو بصينا لتعريفات الكتب هنلاقي ان بيقول عن النكرة انها اسم لا يدل ع شيئ معين او ع اسم معين
و ده نفس الكلام انه مبيبقاش حاجة معروفة و لا بيدل ع حاجة معينة بعينها كده
يعني حاجة عامة

و هنعرف معلومة معينة سهلة و بسيطة
بيقولي ان اعم الاسماء و ابهمها هي كلم شيء

يعني اي ؟؟
ركز معايا كده
انا لما بقولك كلمة كتاب مثلا
انت صحيح متعرفش انا اقصد انهي كتاب و لا اصلا كتاب ايه بس ممكن بخيالك تستنتج كده في كام نوع من الكتب مثلا تقول هو يقصد كتاب نحو و لا كتاب فقه و لا كتاب تفسير ولا ولا و لا
تمام ؟
و هكذا في كلمة مثلا زي قلم
ممكن تقولي انت تقصد قلم حبر ولا قلم جاف ولا قلم رصاص ولا ولا ولا
صح ؟
يبقا ع الرغم من ان النكرة مبهمة و مش عارف تحدد انا اقصد ايه و بتسالني و عاوزني احددلك لكن انت بالفعل قادر تفكر و جبت كذا نوع من الكلمة و عاوزني انا احددلك انا اقصد انهي فيهم
صح كده ؟؟


لكن لو جيت اقولك كلمة شيء

تقدر تسالني مثلا و تقولي انت تقصد كذا و لا كذا و لا كذا و لا كذا

لا مش هتعرف و جربها كدة
!!!!!!

مش عارف صح ؟؟

يبقا عشان كده قالوا انها اعم و ابهم الاسماء

مفيش منها كذا حاجة و انا بحدد لا دي كلمة شيء دي مبهمة اصلا
ركززززززز

شوف لما نقول
الصدق شيء عظيم
كلمة شيء لا يمكن انك تقدر تتخيلها مثلا او انك تلاقي ليها تحديد
لانها كلمة عامة
يارب تكون وصلت


نيجي لحاااجة اخيرة في درسنا النهاردة و نقول
اغراض التنكير
في الحقيقة في النحو عندنا المفروض ان مفيش حاجة اسمها اغراض التنكير
لكن الاغراض دي تبع علم البلاغة
نعرفهم و براحة كده
.............................
اول حاجة الوحدة

يعني هنلاقي الكلمة النكرة دي بتدل ع شخص واحد او حاجة واحدة
زي ايه

جاءني رجل
زارتني امرأة
كتبت كلمة
ذاكرت درسا
فهمت مقولة

لو لاحظنا كده (رجل - امرأة - كلمة - درسا - مقولة )ـ
كل دول نكرات صح ؟
و كل كلمة منهم بتدل ع شخص واحد او حاجة واحدة
تمام كده ؟


.............................
تاني حاجة الجنس

هنلاقي الكلمة النكرة دي بتدل ع جنس بحاله مش بقصد بيها حاجة واحدة لا دنا بقصد الجنس كله يعني كل اللي لييه صلة بالكلمة دي انا اقصده

زي

شربت ماءً

هنا انا اقصد اني شربت من جنس الماء
مقصدش ماء معين
اكلت زيتا

اقصد برضوا اني اكلت من جنس الزيت
مقصدش زيت معين
بغض النظر كلت او شربت اد ايه كتير او قليل

.............................
تالت حاجة التهويل و التعظيم

هنلاقي الكلمة النكرة بتحسسني بحاجة شديدة كده اخاف منها زي ايه


الوقوف بين يدي الله امر صعب فهل نحن مستعدون

كلمة امر نكرة صح ؟
طب بتحسسني ب اي
حاسس بان فعلا الامر ساعتها ش هين
لا دا امر صعب و خطير

يبقا تهووويل و تعظيم لان الامر من خطورته بانت عظمته يعني اعمله حسابه

............................
رابع حاجة التقليل

هلاقي الكلمة النكرة اللي عندي بتدل ع حاجة قليلة و في المقابل اصحاب الذهن المقابل فاكرين انهم عملوا حاجات كتير

زي بالظبط الرجالة لما نساءهم تشتكي من شغل البيت فيردوا يقولوا ايه
هو انتوا بتعملوا حاجة ؟؟
صح ؟ ههههههههه

نفس الكلام نلاقي الكلمة معناها التقليل من اللي حصل

زي ايه

قلت لصاحبي فعلت كذا و كذا و كذا و كذا و كذا
فرد قائلا و هل هذا عمل ؟؟

كلمة عمل نكرة و قللت من اللي عمله كأنه معملش حاجة اصلا


و زي لما اقول

الدنيا ساعة

هل فعلا الدنيا ساعة ؟؟
طبعا لا
انا بقلل من كيان الدنيا باعتبرها ساعة لانها فانية

...................................
خامس حاجة التحقير

هنلاقي المعنى بيدل ع حقارة و وضاعة

الكذب خيانة

بالاضافة ان المعني واضح لكن التنكير نفسه بيقولي ان في تحقير للخيانة


الجهل ظلام

كلمة ظلام بتديني معنى تحقير للظلام اللي هو المقصود بيه الجهل

الدنيا غرور

كلمة غرور تنكيرها فيه تحقيرللغرور

و هكذا

...............................
سادس حاجة التعظيم

عكس التحقير هنلاقي الكلمة فيها تعظيم

جاء الينا رسول من الله

كلمة رسول فيها تعظيم و اجلال لانه من الله


كتبت آية من القرآن

كلمة آية لها تعظيم

.........................
امثلة من القرآن

هُدىً لِلْمُتَّقِينَ
وَرِضْوانٌ مِنَ اللهِ أَكْبَرُ
ولكم في القصاص حياة
وجاء رجل من أقصى المدينة يسعى


كده التنكير خلاص تمام


*******************************************
المعرفة بقا اتفقنا انها شيء معين و محدد وعروف عشان كده سموه معرفة

و ده لييه انواع كتير هنعرفها بالتفصيل ان شاء الله في الدروس اللي جاية



حاجة هنختم بيها افرق بين النكرة و المعرفة
اتفقنا بالالف و الام
الكلمة اللي مفيهاش تبقا نكرة و لو حطينالها الف و لام تبقا معرفة
تمام ؟


و كمان (رُبّ)ـ
الكلمة اللي تدخل عليها رُبّ و المعنى شغال يبقا الكلمة نكرة لو المعنى مش شغال تبقا معرفة



بس كده انتهى الدرس
avatar
Admin
Admin

المساهمات : 31
تاريخ التسجيل : 19/07/2018

معاينة صفحة البيانات الشخصي للعضو http://elmohtarefeen.ahlamontada.com

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى