الدرس الحادي عشر : الفعل المبني للمعلوم و المبني للمجهول

اذهب الى الأسفل

الدرس الحادي عشر : الفعل المبني للمعلوم و المبني للمجهول

مُساهمة من طرف Admin في الإثنين يوليو 23, 2018 7:14 pm


معانا درس النهاردة سهل جدا اسمه المبني للمعلوم و المبني للمجهول
زي ما اتعودنا نفهم معني العنوان هنفهم كل حاجة بعد كده تبقا سهلة
احنا لما بنكون عندنا حاجة عارفينها بنقول دي حاجة معروفة دي حاجة معلومة صح ؟
طب لو مش عارفينها يقولوا عليها ايه ؟ منعرفهاش يعني مجهولة
صح كده ؟
يبقا لما ابقا عارف يبقا معلوم
طب لو معرفوش يبقا مجهول
تمام كده؟

تعالا عندي في النحو بقا
احنا شغلنا مع الفعل في درسنا النهاردة
طب هو كل فعل محتاج ايه ؟
محتاج فاعل
امسك الفاعل ده امسكه اوعي يهرب منك

انت لو الفاعل ده موجود في الجملة
يعني عرفته يعني عالم بيه يبقا الفعل ده ؟
ايوة كده سامعك بتقول مبني للمعلوم

طب الفاعل مش موجود في الجملة يعني معرفوش يعني مجهول عني
يبقا ؟
يبقا مبني للمجهول
تمام ؟
فيها صعوبة ؟
طب بالامثلة نفهم اكتر
كتب أخوك الدرس
كتب هو الفعل تمام
عاوز الفاعل اقول ايه ؟ مين اللي كتب ؟
اسال كده ، مين اللي كتب ؟
هنقول اخوك
يبقا اخوك الفاعل صح كده ؟
طب انا عرفت الفاعل يبقا ده مبني للمعلوم و لا للمجهول ؟
للمعلوم

طب لو قولت
كُتِب الدرس
كُتِب هو الفعل
اقول مين اللي كتب ؟
واحد هيقول الدرس طب هو الدرس هيكتب ؟
لا
يبقا انا اعرف الفاعل ؟
لا
يبقا كده مجهول عني
يبقا مبني للمجهول
تمام كده ؟

يبقا اظن كده اي جملة نقدر نعرفها معلوم و لا مجهول صح كده ؟

الوقتي بقا محتاجين نعرف ازاي نحول من معلوم لمجهول
اول حاجة الفعل الماضي
الماضي يا سيدي هتحط ضمة ع اول حرف و كسرة ع الحرف قبل الاخير
كتب. كُتِب. الكسرة تحت التاء عشان قبل الاخير مش عشان الحرف التاني

استخرج. اُستخرِج
فهم. فُهِم
انتصر. اُنتصِر
طب يا عم بص معايا لو الفعل ده الحرف قبل الاخير كان الف تتقلب ياء ع طول اشمعنا ياء ؟ مش احنا بنحط كسرة يبقا الياء اقرب ليها
قال. قيل
نام. نيم
خاف. خيف
نال نيل
طبعا القاف مبقتش عليها ضمة عشان حركة الياء متناسبش الضمة بدلناها كسرة

طب لو الفعل اللي معايا مضعف يعني يكون من حرفين و الحرف التاني عليه شدة بحط ضمة بس ع الحرف الاول و الشدة زي ما هي
شدّ. شُدّ
مدّ مُدّ
ردّ رُدّ

طب لو الفعل اللي معايا من ٤ حروف و الحرف التاني الف طب انا بحط ضمة ع اول حرف و قولنا تاني حرف ده هيكون الف مينفعش ضمة بعدها الف
نعمل ايه نقلب الالف دي واو عشام تناسب الضمة
عامل. عُومِل
شارك. شُورِك
ساهم. سُوهِم
عالج. عُولِج
قاسم. قُوسِم

.................................................................
نيجي للفعل المضارع

هنحط ضمة برضوا ع اول حرف
و هنحط هنا بقا فتحة ع الحرف قبل الاخير

يبقا ماضي و مضارع ضمة ع الحرف الاول
انما الحرف قبل الاخير في الماضي كسرة و المضارع فتحة . تمام ؟

نرجع للمضارع
يكتب. يُكتَب
يفهم. يُفهَم
يشرب. يُشرَب
يشرح. يُشرَح

تمام ؟

طب لو الفعل المضارع ده الحرف قبل الاخير كان واو او ياء يتقلب الف
اشمعنا الف ؟ مش احنا بنحط فتحة ؟يبقا الالف قريب منها
يبيع. يُباع
يقول. يُقال
يخاف. يُخاف
ينال. يُنال
ينام. يُنام
طبعا حد هيسال يقول (يخاف ، ينال ، ينام) مقلبناش دا هي زي ما هي صح ؟
معلومة ليك انت بقا ، الالف دي اصلها واو اصلا بدليل بنقول الخوف و النوم و النيل اصلها ياء متشغلكش في حاجة و مش هتأثر ع حاجة تمام ؟



كده انت تعرف تجيب الفعل المبني للمجهول بسهولة

طب في حاجة
لما كان مبني للمعلوم كان الفاعل موجود
و كان بيتعرب فاعل مرفوع عادي
طب في المبني للمجهول مفيش فاعل
طب الاسم اللي بعد الفعل يعرب ايه ؟
نائب فاعل
الفاعل سافر بلد تانية و ده النائب بتاعه و معاه كل صلاحياته
يعني مرفوع زيه
يبقا
يُقال الحق
يقال فعل مضارع مرفوع و علامة رفعه الضمة الظاهرة
الحق نائب فاعل مرفوع و علامة رفعه الضمة الظاهرة

ملحوظة مهمة الافعال تتعرب زي ما انت عارف عادي
البناء للمجهول مبيغيرش حاجة في اعرابها نهائيا



طب حاجة اخيرة
بنقول احنا عرفنا ان في افعال اعطي و اخواتها بتنصب مفعولين
زي
أعطي المدير الطالب الجائزة
فعل+فاعل+مفعول١+مفعول٢

لو عاوزين مبني للمجهول
اول حاجة هنحذف الفاعل خالص
تاني حاجة نظبط الفعل زي ما عرفنا فوق
و نخلي الاسم اللي بعد الفعل مرفوع عشان بقا نائب فاعل
رابع حاجة لو هما مفعولين بنسيب المفعول التاني زي ما هو

يبقا
أُعطِي الطالبُ الجائزةَ
فعل+نائب فاعل+مفعول٢



كده يبقا الحمد لله الدرس انتهى
..................................................................


و السلام عليكم و رحمة الله
avatar
Admin
Admin

المساهمات : 31
تاريخ التسجيل : 19/07/2018

معاينة صفحة البيانات الشخصي للعضو http://elmohtarefeen.ahlamontada.com

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى